Од Владата на Република Северна Македонија напоменаа дека бремените жени се ослободуваат од работа со физичко присуство до завршување на пандемијата со Ковид-19, согласно владината одлука. Тие потсетуваат на оваа мерка поради изразен интерес од граѓани околу тоа дали оваа мерка ќе важи и со почетокот на 2021 година.
„Содржината на мерките е регулирана со членот 13, точка 11 и членот 16 од Одлуката за превентивни препораки, времени мерки, наредени мерки, наменски протоколи, планови и алгоритми за постапување за заштита на здравјето на населението од заразната болест КОВИД-19, предизвикана од вирусот SARS-CoV-2, случаите и временскиот период на нивна примена, објавена во Службен весник на 04.11.2020 година“, информираат од Владата.
Владината одлука е донесена на седница на Владата на Република Северна Македонија, одржана на 03.11.2020 година, по препорака на Комисијата за заразни болести.