Со почеток од 18 часот, вечерва (петок) во Кинотеката на Северна Македонија ќе се отвори втората самостојна изложба на фотографот Коста Дупчинов, насловена „Носталгија – втор дел“. Фокусот на Дупчинов, овојпат се старите занаети, а се работи за колекција на 34 фотографии испечатени на фото платно кои се составени од моменти и емоции доловени преку уметничка фотографија.
Изложбата е продолжение на неговата прва самостојна изложба „Носталгија“ од 2017 година, која беше изложена во неколку градови низ земјата и беше дел од неколку филмски фестивали, а исто така и како дигитална презентација во неколку земји во светот.
„Портрети на херои на едно време, занаетчии и нивните дела. Додека нивното време минува, нивните дела и занаети остануваат безвременски, со носталгичен став гледаат кон минатото. Овие занаети се инструментални за многу заедници низ историјата, а услугата што им ја прават на луѓето е немерлива, но за жал, умира во нашиот современ свет. Овие портрети зборуваат токму за тие занаетчии, фатени во околината на работата на нивните животи. Единствените занаети за кои ги поминале нивните животи сега стануваат минато, со моќно чувство на носталгија што нè тера да сакаме овие занаети никогаш да не завршат“, стои во најавата за настанот.
Дупчинов има учествувано на повеќе од 70 изложби, каде има освоено околу 20-тина награди и признанија. Неговите фотографии веќе неколку години се дел од колекцијата која ја претставува Македонија на Светскиот куп на фотографија.