Оваа есен, по првпат ќе биде одржан фотографскиот натпревар насловен „Астрофото натпревар“. Натпреварот на фотографии е организиран од здружението „Споделено Знаење“ огранок на Википедија/Викимедија во соработка со „Скопското астрономско друштво” на теми од астрофотографија односно фотографии на астрономски тела и предмети во вселената.
Целта на натпреварот е да се соберат фотографии од астрономски тела, предмети, објекти, појави како и небесни настани во вселената, сликани на ноќното небо со главна цел тие да бидат и понатаму да се користат од документарен и информативен карактер. Овие фотографии потоа ќе можат да се прикачат на Ризницата на Викимедија под слободна лиценца, а понатаму ќе можат да се користат за илустрирање на статии за тие области на Википедија, како и за други слободни проекти.
Најуспешните фотографии според оценката на стручно жири ќе бидат наградени со парични награди.
Натпреварот ќе трае од 15 октомври 2019 во 0:00:00 часот и 15 ноември 2019 г. во 23:59:59 часот. Учеството е слободно преку пријавување на формуларот за учество. Автор на фотографијата мора да биде самиот учесник во натпреварот, а бројот на фотографии прикачени од еден автор е неограничен. Содржината на фотографијата мора да биде од документарен карактер и фотографијата на астрономски тела, предмети, објекти, појави, небесни настани и области во вселената на ноќното небо може да биде направена било каде, во и надвор од територијата на Македонија.
Повеќе информации за самиот натпревар, правилата за учество може да се најдат на проектната страница Астрофото Натпревар, а повеќе информации ќе бидат споделувани и на социјалните мрежи.