Ефектот од користењето на социјални медиуми врз благосостојбата на тинејџерите е ограничена и веројатно мала, покажала британска студија врз 12.000 адолесценти.
Многу поголем ефект врз психофизичката состојба на тинејџерите имаат семејството, пријателите и училишниот живот, дополнително е наведено во научното истражување на Универзитетот Оксфорд, за кое истражувачите велат дека е многу посложено и поголемо од претходни студии на оваа тема, пренесе Би-Би-Си.
Научниците истовремено ги повикуваат компаниите да ги објават податоците за тоа како луѓето ги користат социјалните мрежи со цел подобро да се разберат влијанијата од оваа технологија врз животите на младите луѓе.
Студијата, која е објавена во списанието „PNAS“, се обидува да одговори на прашањето за тоа дали тинејџерите кои користат социјални мрежи повеќе од просекот имаат помала животна сатисфакција, или пак дали тинејџерите кои се помалку задоволни од животот користат повеќе социјални медиуми.
Претходни истражувања за користењето електронски уреди и детското ментално здравје, најчесто биле контрадикторни.
Професорите Ендру Прзибилски и Ејми Орбен, од Оксфордскиот институт за интернет велат дека новата студија заклучила дека најчесто поврзаноста меѓу животната благосостојба и користењето на социјалните мрежи била „тривијална“ и учествува во помалку од 1% од вкупната благосостојба на тинејџерите.
„99,75% од задоволството во животот кај луѓето нема никаква врска со социјалните медиуми“, објаснува Прзибилски.
Студијата се спроведувала во периодот меѓу 2009 и 2017 година, во која биле анкетирани илјадници млади на возраст меѓу 10 и 15 години за тоа колку време вообичаено користат социјални медиуми и како се задоволни од различните аспекти од животот.
„Родителите не треба да се грижат за времето поминато на социјални медиуми – мислејќи дека тоа е погрешно. Фиксирани сме на времето, но треба да ги заборавиме овие наши претпоставки за времето поминато пред екраните. Резултатите кои ги добивме не покажуваат докази за голема загриженост“, додава Прзибилски.
Научниците велат дека сега е потребно да се идентификуваат младите кои се во поголем ризик од некои ефекти на социјалните мрежи и да се пронајдат другите фактори кои имаат поголем ефект на нивната благосостојба. Нивниот план е наскоро да остварат средби со компаниите кои развиваат социјални медиуми за да дискутираат како заеднички можат да научат повеќе околу начинот на кој луѓето ги користат апликациите – не само за времето кое го поминуваат со нив.