Лани најмалку 95 новинари биле убиени при извршување на својата работна задача, покажуваат статистиките на Меѓународната федерација на новинари (МФН).
Бројот на смртни случаи е поголем отколку во 2017 година, но не толку колку за време на конфликтите во Ирак и Сирија.
Најголем број на регистрирани смртни случаи во медиумите изнесува 155 во 2006 година.
Овие бројки го вклучуваат секој што работи во медиумска организација.
Едно убиство во 2018 година, кое привлече глобално внимание, беше на истакнатиот саудиски новинар Џамал Кашоги.
Тој беше убиен минатиот октомври, откако отишол во саудискиот конзулат во Турција.
Случајот предизвика дипломатска криза меѓу двете земји и лавина на осуди од целиот свет.
Сепак, Авганистан останува една од најсмртоносните земји за новинарите, со 16 смртни случаи минатата година.
Девет авганистански новинари загинаа во инцидент во главниот град Кабул, откако отишле на местото на бомбашкиот напад за да известуваат за она што се случило. Втората експлозија била активирана од бомбаш за кој се вели дека се маскирал себеси како новинар.
И на исток од Авганистан, новинарот на Би-Би-Си Ахмад Шах беше убиен во една од серијата напади во провинцијата Кост.
Но, новинари загинаа и во Америка.
Петмина беа убиени во напад врз канцеларијата на весникот „Капитал весник” во Мериленд, од човек кој наводно се обидел да го тужи весникот неколку години претходно.
Зголемената нетолеранција кон известувањето, популизмот, како и корупцијата и криминалот сега се важни фактори, велат од МФН.
Тие „придонесуваат за создавање средина во која има повеќе новинари убиени при известување во нивните заедници, градови и земји, отколку при известување од зони на вооружен конфликт”.
Комитетот за заштита на новинарите секоја година ја следи состојбата со новинарите кои биле затворени поради својата работа.
Земјите со најголем број затворени новинари во 2018 година се Турција – 68, Кина – 47, Египет – 25 и Саудиска Арабија и Еритреја со по 16 затворени новинари во двете држави.
Обединетите Нации годинава ја истакнуваат виталната улога на слободата на печатот за демократијата, особено за време на избори.
Генералниот секретар на ОН Антонио Гутереш во изјава рече дека „демократијата не е целосна без пристап до транспарентни и веродостојни информации”.
Во својот Светски индекс за слободата на медиумите оваа година, организацијата „Репортери без граници” ја опишува ситуацијата во САД како „проблематична”. Драстичен пад на слободата на медиумите се забележува и во Индија и Бразил, како и Венецуела, Русија и Кина.