После упатеното барање за организирање на Ден без автомобили на крајот на август, НаТочак повторно ги потсетува општините за можноста да организираат Ден без автомобили/Отворени улици (Open streets) на 22-ри септември.
„На 22-ри септември е светскиот Ден без автомобили. На овој ден над 1.500 градови во светот ќе затворат една, неколку или многу улици за автомобилски сообраќај, а ќе ги отворат за активности за луѓето. Целта е барем на овој ден децата да може да поиграат слободно и безбедно на улица и целта е сите ние да почнеме да замислуваме поинаква иднина за нашите градови: со повеќе пешачење, возење точак, користење јавен превоз“, соопштува велосипедската иницијатива.
Вело-активистите потенцираат дека Ден без автомобили не значи да помине велосипедска парада за половина час, туку значи улицата во текот на повеќе часови на денот да биде отворена за различни активности: детски улични игри, возење точаци и тротинети, џогирање, вежбање на отворено, музика, шетање… Односно, можностите се многу и, велат тие, зависат и од ангажманот на општината.
„Целта е да доживееме како изгледа нашето соседство со повеќе игра, а помалку бучава од автомобили, со повеќе активни луѓе и помалку загадување. Овој ден е и во склоп на Европската недела на мобилност. Можете да се пријавите на официјалниот сајт како општина со вашите активности: (од Македонија моментално има пријавено 6 градови). Можете слободно да ги користите и нивните материјали од линкот.
Исто така, ве поттикнуваме како општини и Град Скопје меѓусебно да се координирате за овој ден, да направите заедничка промоција и навистина да го видиме Скопје (различни делови од Скопје) во поинакво светло на овој ден“, соопштува НаТочак.
Од некои општини (Центар, Карпош, Кисела Вода, Аеродром, Град Скопје…) веќе добиле најави дека планираат да имаат сопствени активности.
„Се надеваме ќе се придружат и другите. Денот треба да биде општа прослава на граѓаните на градот, а не нервоза за возачите. Затоа, апелираме што побрзо да објавите точно кои улици во кој период ќе бидат затворени за автомобилски сообраќај, а отворени за луѓето. Навремената информација ќе ги намали нервозите, а ќе го зголемите бројот на луѓето кои со радост ќе учествуваат. Верувајте, има многу такви кои едвај чекаат вакво нешто. После првото одржување на ваков настан, речиси насекаде во светот, граѓаните сами бараат да се повторува, зашто тој настан е ретка можност да се сретнат со соседите, да се социјализираат, особено битно за постарите лица, децата со посебни потреби итн. (пример)“, соопштува НаТочак.
Според иницијативата, затворањето на улицата за автомобили ќе биде невообичаено и уникатно искуство на нашите простори кое верувааѕ дека ако добро се промовира, добро се организира и ако се анимираат граѓаните, ќе остави многу позитивен впечаток.