Кочанското здружение Втора шанса, поддржано од сите македонски здруженија за правата на животните, најави протестен собир во градот, со кој ќе побара итна интервенција од полицијата, социјалните установи и сите останатите надлежни, за да го спречат лицето кое со години малтретира улични кучиња. Тие бараат затвор, или негово хоспитализирање.
„ Ги повикуваме сите хумани, засегнати граѓани да нè поддржат зошто преку игнорирање на ова лице – кое треба да биде прегледано, анализирано/хоспитализирано/ или затворено (постојат надлежни, стручни служби да извршат проценка) е засегната безбедноста на сите, а немо и без совест и срам се толерира мачење и убивање на животните! Не е далеку денот кога би посегнал и по човечки живот. Дел од активистите во Кочани почнаа да добиваат и закани од блиски лица на Н.Т. Да дадеме поддршка на овој протест и да покажеме дека на злото не му е местото во едно општество и идност каква што посакуваме“, стои во повикот за протестниот собир.
Сепак, тие во нивниот апел потсетуваат дека упорно не се презема ништо, и покрај известувањата на медиумите за неколкуте грозоморни случаи. Од Здружението нагласуваат дека и мајката на ова лице сведочела дека е малтретирана, исто како и животните.
„Полицијата, останатите надлежни институции се тие кои не превземаат ништо и како такви, во нив лежи одговорноста за бројните мачени, силувани, убиени кучиња во Кочани“, велат од Здружението.
Протестот ќе започне во 14:30 часот, во центарот на градот.