По повод одбележување на Светскиот ден на извидниците, 22 февруари, извидниците од најстариот извиднички одред во Македонија одржаа низа активности за помош и поддршка на оние на кои им е најпотребно.
Светскиот ден на Извидниците се слави на роденденот на основачот на најголемото младинско движење во светот, Роберт Баден Пауел.
На многу места е потребна помошта и поддршката за хуман гест. Затоа извидниците од ПСИО се поделија и излегоа на терен да направат добро дело.
На 18 февруари извидниците ги посетија децата од социјално загрозените семејства од ОУ Дитуриа во Сарај на кои им донираа зимска облека, кондури и училишен прибор. Наскоро велат дека ќе се вратат со дополнителна помош, бидејќи е потребна храна и прибор за хигиена. Донација со облека беше направена и на неколку ромски семејства, кои навистина живеат во незавидни услови.
На извидниците од јато Фикуси оваа година им е прва како се вклучуваат во мисијата Добро дело по повод Светскиот ден на Извидниците 22 Февруари. Тие годинава решија да ги посетат децата од Домот 11 Октомври во Капиштец и да им го презентираат извидничкиот начин на живеење, вреќа за спиење, шатор, каков ранец користат, како палат оган со помош на магнезиум, но и основи за Прва Помош и Заштита и многу извиднички игри. Извидниците на ПСИО традиционално и оваа година подготвија сендвичи кои ги поделија на гладните по скопските улици.
Присуствувале и во Дневниот Центар за деца на улица Шуто Оризари, како и во СОС Детското село. Таму, ги научиле на извидничката азбука за декодирање, како да врзуваат јазли и „ултимејт фризби“.
Целта на извидничкото движење е да се градат идните генерации во корисни граѓани, со поширока перспектива, а со тоа да се развие и добрата волја како и мирот во светот преку другарство, еднаквост и соработка.
ПСИО воедно апелира до јавноста за донација на средства за хигиена (од секаков карактер и за лична и домашна) и храна. Оние кои сакаат да помогнат, можат да ги донесат донациите во одредот секој ден во 19:00ч., а тие ќе ги однесат кај семејствата.