Претседателот на Република Македонија, Ѓорге Иванов попладнево му го врачи мандатот за состав на новата Влада на претседателот на ВМРО-ДПМНЕ, Никола Груевски.
Ова доаѓа откако ВМРО-ДПМНЕ и коалицијата освоија најголем број пратенички места на предвремените парламентарни избори што се одржаа на 11 декември. И по прегласувањето во избирачкото место 2011 во Теарце, одржано на 25 декември, партијата на Груевски остана со 51 мандат, СДСМ и коалицијата со 49 пратеници, ДУИ со 10, БЕСА 5, Алијанса на Албанците 3, а ДПА со 2 пратеници.
Сега, мандаторот Груевски во рок од 20 дена на Собранието треба да му поднесе програма и да го предложи составот на Владата.
Владата, на предлог на мандаторот и врз основа на програмата, ја избира Собранието со мнозинство гласови од вкупниот број пратеници.
Според прогнозите, следува неизвесен период, особено откако албанските партии потпишаа Платформа со услови, а Алијанса на Албанците и БЕСА денеска најавија дека нема да коалицираат со Груевски. Претседателот на ВМРО-ДПМНЕ, пак, рече дека „ќе се обиде да состави Влада, но не по секоја цена“.
Фото: Мета