Фатени за рака, еден до друг, неколку стотици граѓани вечерва го прегрнаа ГТЦ и побараа зачувување на автентичноста на објектот, наместо негово преоблекување во барок.
Поделени во две групи, насобраните го заобиколија објектот, со што симболично порачаа дека го сакаат ваков каков што е сега.
Според Даница Павловска, претседател на Асоцијацијата на архитекти на Македонија, тие како иницијатори на настанот се изненадени и задоволни од високиот одзив на граѓаните кон оваа иницијатива.
Ова за Павловска е показател доказ дека не смее да се посегне по автентичноста на ГТЦ, но и порака до надлежните да ги земат предвид желбите на граѓаните.
На заедничкото гушкање на Трговскиот центар му претходеше собирање на потписи за петицијата „Го сакам ГТЦ“. Од 10 до 18 часот беа собрани околу 2 илјади потписи, по што се создаде и најголемата гужва. Стотици граѓани останаа во редот трпеливо чекајќи да го стават својот потпис на петицијата.
Од Асоцијацијата на архитекти се децидни: најавените планови за новата фасада на ГТЦ не смеат да се реализираат. Идните чекори за зачувување на изгледот на ГТЦ ќе бидат прецизирани следниве денови.
На петицијата се потипиша и Лидија Марковска, еден од авторите на главниот проект за ГТЦ:
Видео: А1ОН