На 27 септември (недела) на градската плажа „Парк“ во Скопје ќе се одржи првиот пикник на веганска храна во Македонија – „Вегепикник“, под мотото „Смени ја исхраната, смени го светот“!
„Сè повеќе луѓе се ориентираат кон вегански начин на исхрана (и живот) не само од здравствени, туку и од етички причини, но и поради заштита на животната средина.
Веганскиот начин на живот не значи само поголема виталност, зајакнување на имунитетот и подобрување на општата здравствена состојба – ваквиот начин на живот значи и елиминирање на насилството кон животните (и луѓето), ублажување на огромните разлики во животниот стандард меѓу луѓето (што директно придонесува за решавање на проблемот со светската глад), како и создавање еколошка култура и значително намалување на антропогениот притисок врз животната средина.
Веганската храна често е нарекувана бесвкусна, еднолична, „трева со вегета“, итн. Ве предизвикуваме да дојдете на Вегепикникот и да се уверите во спротивното. Убедени сме дека нема да може да се одлучите кој е повкусен од многубројните креативни специјалитети што скопските угостители и блогови за храна ќе ги приготват специјално за вас“, велат организаторите, здружението за заштита на животните и животната средина „ЕДЕН“
Првото издание на „Вегепикник“ во Скопје се одржува по повод Светскиот ден на здрава животна средина (26 септември) чие овогодинешно мото е „Децата се нашата иднина – да ги заштитиме нивната животна средина и нивното здравје“.