Твитер избриша илјадници профили од Србија, Египет, Хондурас, Индонезија и Саудиска Арабија поради работење по владини директиви или промовирање на провладини содржини, пренесува „Ал Џазира Балканс“. Меѓу нив има и 8.558 профили кои ја промовирале владејачката партија во Србија „Српска напредна странка“ и нејзиниот претседател Александар Вучиќ.
Твитер и останатите социјални мрежи се под притисок за отстранување на сите дезинформации и говор на омраза од своите платформи, а тие исто така добиваат и посебно внимание поради пандемијата со коронавирусот, која исто така се злоупотребува.
A network of accounts associated with Saudi Arabia and operating out of multiple countries including KSA, Egypt and UAE, were amplifying content praising Saudi leadership, and critical of Qatar and Turkish activity in Yemen. A total of 5,350 accounts were removed.
— Twitter Safety (@TwitterSafety) April 2, 2020
Оттаму соопштија дека профилите биле избришани затоа што ја кршеле политиката на платформата и биле намерно создадени како би поткопале јавна расправа.
Во меѓувреме, отстранети се и 2.541 профили кои се поврзуваат со египетскиот весник „Ел Фагр“, поради создавање лажни профили кои генерирале пораки со кои се критикуваат Иран, Катар и Турција.
„Информациите што ги добивме укажуваат на тоа дека профилите следеле упатства од египетската влада“, велат од „Твитер“.
Компанијата избришала и 3.104 лажни профили направени од една ИП-адреса во Хондурас од страна на владин службеник кои биле наменети за споделување на содржините од претседателот.
Истрагата која следеше по извештајот на истражувачката веб-страница „Белингкат“ резултираше со отстранување на 795 лажни профили поврзани со индонезиска информациска операција насочена кон движењето за независност на Западна Папуа.
„Твитер“ исто така отстрани и 5.350 профили поврзани со Саудиска Арабија кои работеле од Саудиска Арабија, Египет и Обединетите арапски емирати со чија содржина се фалело саудиското раководство, а се критикувал Катар и турските операции во Јемен.