Моќен халуциногеник, познат дека се употребува во шаманските ритуали, за прв пат се испитува како потенцијален лек за депресија. На учесниците ќе им биде давана дрогата ДМТ (DMT), проследенa со терапија со зборување, објави Би-Би-Си.
Истражувачи сметаат дека ова може да понуди алтернатива за значителен број луѓе кои не реагираат на конвенционалните апчиња за депресија. Исто така, психоделичната асистирана терапија би понудила подолгорочно ослободување од симптомите.
Зголемениот број докази укажуваат дека и другите психоделици, особено заедно со терапијата со зборување, се безбедни и можат да бидат ефикасни за лекување на низа ментални болести.
Ова ќе биде прв пат ДМТ да се дава на лица со умерена до тешка депресија во клиничко испитување.
Керол Рутлиџ, главен научен директор на „Смол Фарма“, компанијата што го спроведува тестирањето, вели: „Веруваме дека влијанието ќе биде скоро непосредно и ќе трае подолго од конвенционалните антидепресиви“.
ДМТ е позната како „спиритуална молекула“ поради начинот на кој ја менува човечката свест и создава халуцинации кои се споредуваат со искуство близу до смрт.
Тоа е исто така активна состојка во ајахуаска, традиционален растителен лек од Амазонија, кој се користи за да се донесе духовно просветлување.
Истражувачите веруваат дека лекот може да помогне во олабавување на фиксните патишта на мозокот, кои потоа може да се „ресетираат“ со терапија за зборување.
Но, оваа хипотеза сè уште треба да се докаже. Тимот се консултира со Империјал колеџ во Лондон, кој раководи со пионерскиот Центар за психоделични истражувања.
Како дел од студијата, тие се надеваат дека ќе испитаат дали лекот може да се администрира еднократно или како дел од курсот. Испитаниците ќе бидат следени најмалку шест месеци за да се види колку траат ефектите од третманот.
Во меѓувреме, следната недела во Бристол треба да се отвори клиника за терапија со кетамин. Додека лекот веќе се користи за депресија на клиники како таа во Оксфорд, тој не е придружен со психотерапија.
Како што пишува Би-Би-Си, досега необјавени истражувања презентирани на конференција од професорот по психофармакологија на Универзитетот во Ексетер, Селија Морган, сугерираат дека кетаминот придружен со терапија има многу подолготрајни ефекти.
Морган рече дека има сè поголем доказ дека дрогите, вклучувајќи псилоцибин, ЛСД, кетамин и МДМА (Екстази), се безбедни и можат да играат улога во третманот на нарушувања на менталното здравје.
Постоеја некои рани докази дека тие можат да имаат подолгорочни ефекти отколку конвенционалните лекови пропишани како антидепресиви, познати како SSRI, но беа потребни повеќе истражувања.
„Тие исто така функционираа со користење на сосема поинаков механизам“, објасни Морган.
Додека конвенционалните лекови можат да донесат негативни чувства, „се чини дека овие лекови дозволуваат да пристапувате кон тешките искуства во вашиот живот, да седите со таа вознемиреност и да ги обработувате“, рече таа.
„Можеби ќе дојдеме до нешто посуштинско, што е основната причина за проблемот“, рече Морган.
„Преку тоа сметаме дека можете да добиете многу подолготрајни промени“
Проф. Мајкл Блумфилд, консултант психијатар од Универзитетскиот колеџ во Лондон, истакна дека иако станува збор за „навистина возбудлива“ област на истражување, потребна е претпазливост за преголемиот потенцијал на ваквите дроги.
Тоа исто така, вели тој, е поле на терапија отворена за злоупотреби.
Морган ја истакна важноста на лековите што се користат во контекст на терапијата, бидејќи постои загриженост дека „луѓето би помислиле дека можат да пробаат со некои рекреативни дроги“.
„Но, навистина не е како тоа функционира“, смета Морган.