Илјадници граѓани низ Франција се собраа на протести против антисемитизмот, по повеќето антисемитски напади во последниве недели, кои кулминираа во текот на вчерашниот ден откако вандали исцртаа свастики и навредливи пораки на десетици гробови на еврејски гробишта.
Политичките лидери од сите партии, меѓу кои и поранешните претседатели Франсоа Оланд и Николас Саркози, се собраа во Париз на полниот Плоштад на републиката за да испратат пораки на осуда за антисемитски акти под слоганот „Доста е!“.
Собири се организирале и во други француски градови, од Лил на север, до Тулуз и Марсеј на југот на земјата.
Претседателот Емануел Макрон оддаде почит на локацијата на вандализираните гробови во селото Катценхајм, во близина на Стразбург.
„Кој и да го сторил ова не е достоен за Француската република и ќе биде казнет. Ќе преземеме акција, ќе го спроведеме законот и ќе ги санкционираме“, изјави Макрон.
Францускиот претседател подоцна го посети и националниот споменик на Холокаустот во Париз заедно со предводниците на Сенатот и Националното собрание.
Франција е дом на најголемата еврејска заедница во Европа – околу 550 илјади луѓе. Владините статистики, објавени минатата недела, покажуваат дека во земјата се случиле повеќе од 500 антисемитски напади минатата година, што е зголемување за 74% во споредба со 2017.