Проекција на дигитално реставрираниот антологиски филм „Кој тоа таму пее“ во Кинотека

Утре (среда, 15 септември) во 20 часот, во летното кино „Мирно лето“ ( Кинотека) ќе се одржи проекција на култната комедија на Слободан Шијан од 1980-та година „Кој тоа таму пее“ (Ко то тамо пева / Who Is Singing Over There).

Станува збор за нова, дигитално реставрирана копија на филмот кој своевремено беше прогласен за најдобра комедија на сите времиња на југословенските простори, а многумина светски критичари и автори го нагласуваа како еден од омилените филмови. Овој филм на Шијан, како и сто други – антологиски наслови снимени од српски режисери во периодот од 1911 до 1999, кои во 2016-та беа прогласени за национално добро од големо значење – се дел од проектот „VIP Кинотека“ чија цел е да се сочуваат и заштитат филмовите кои ја одбележале српската кинематографија.

Со овој проект започнува и долго очекуваниот процес на дигитална реставрација на српското филмско наследство (https://youtu.be/WvwnU9BJxIs) кој се реализира во Одделението за дигитализација и дигитална реставрација при архивот на Југословенската кинотека во Белград.

По повод оваа проекција, гостин на Кинотеката на РС Македонија ќе биде Југослав Пантелиќ, директор на Југословенската кинотека и уметнички директор на ФЕСТ – белградскиот меѓународниот филмски фестивал кој годинава го одбележа своето 50-то издание.

Проекцијата се организира во рамки на „Скопје филм фестивал класик“, a e поддржана од културно-информативниот центар „Спона“ во Македонија, во соработка со Српската амбасада во Скопје.

Сценариото на филмот е на Душан Ковачевиќ, а во главните улоги се појавува плејада од врвни југословенски и српски актери како Павле Вуисиќ, Александар Берчек, Данило Бата Стојковиќ, Драган Николиќ, Славко Штимац, Неда Арнериќ, Ташко Начиќ, Боро Стјепановиќ, Бора Тодоровиќ, Миливоје Томиќ и други.

Филмот за „скапаниот“ автобус на фирмата „Крстиќ и синот“ со кој група патници се обидува, преку низа перипетии и комични ситуации, да стигне до Белград токму пред нацистичкиот напад на Југославија во април 1941 г. – своевремено беше добитник на повеќе домашни (Златна арена за Александар Берчек во Пула) и странски филмски награди и признанија (Кан – награда на публика; Гран при на фестивалите во Монтрел, Панама, Саламанка, Ротердам, итн.).

Влезот е слободен, а проекцијата ќе се одвива според протоколите за заштита од Ковид-19.