Под мотото „Велосипедска патека сум дете, не ме знаеш ти, од Прилеп си!“, утре (28 ноември) иницијативата ПрилепНаТочак од 17:30 пред општината ја организира 54-тата велосипедска Критична маса.
„Прилеп и понатаму останува единствен поголем град во Македонија кој нема ниту сообраќаен знак за вело – патека, а не пак функционална велосипедска патека. Тажна е сликата кога се асфалтираат и реконструираат улиците низ градот, а притоа пешаците и велосипедистите се комплетно заборавени“, велат од ПрилепНаТочак.
Според велосипедистите Прилеп е град со нула километри велосипедски патеки и тоа, вели иницијативата, е поразителен факт, за чија промена за жал никој нема слух.
„Во светот се прават велосипедски патеки од рециклирани материјали, соларни велосипедски патеки, вело- патеки кој ја апсорбираат дневната светлина и светат преку ноќ, кај нас сеуште е проблем да се намести обичен сообраќаен знак за велосипедска патека. Прилепчани сакаат да се движат низ градот на велосипед, и во лето и во зима, и стари и млади, постојано се на небезбедните градски улици и тротоари и покрај тоа што никој не води грижа за нив и нивните потреби во сообраќајот. Време е за велосипедски патеки во Прилеп, време е за вело инфраструктура, градот го заслужува тоа…“, се вели во повикот за новата Критична маса.