На дводневниот фестивал „Поетски синтези“, што утре започнува во Битола, ќе настапат истакнати автори, членови на Друштвото на писателите на Македонија, меѓу кои: Елена Пренџова, Бобан Богатиновски, Мирјана Стојановска, Зоран Пејковски, Весна Мундишевска, Никола Илијовски, Панде Манојлов, Кире Неделковски, Милица Радевска, Билјана Т. Димко, Христо Петревски и Тоде Илиевски.
Манифестацијата има меѓународен карактер, а во нејзиното ново издание учествуваат Олга Панкина (Русија), Јожев Бенце (Унгарија) и Зоран Маслаковиќ (Србија), соопштуваат од Друштвото на писателите на Македонија.
На поетскиот митинг ќе биде доделена традиционалната награда „Поетска муза“ за естетизација на поетскиот дискурс, интертекстуалност и интерпретација.
Во рамките на манифестацијата ќе биде промовиран зборникот „Битолска поетска разгледница“. За книгата, објавена на македонски и српски јазик, ќе говорат Мирјана Стојановска и Зоран Маслаковиќ.
Организатор на фестивалот „Поетски синтези“ е Здружението за наука и култура НОВА. Фестивалот се одржува во рамките на Битолско културно лето.