Почина Енди Гил, гитаристот на пост-панкерите „Gang of four“

На 64-годишна возраст, почина Енди Гил, гитаристот на култните пост-панкери „Gang of four“, составот од Лидс кој е претпознатлив уште од доцните 70-ти и рани 80-ти по своите социјални и политички ангажирани теми.

Смртта на Гил ја потврди и бендот преку социјалните мрежи.

„Неговата бескомпромисна уметничка визија и посветеност на каузата, значеше дека тој сè уште слушаше миксови од претстојниот материјал, додека ја планираше следната турнеја од неговиот болнички кревет“, стои меѓу другото во соопштението на Џон, Томас и Тобиас од „Gang of four“.

Гитаристот Гил помогна да се оформи бендот како студент во Лидс. Потоа „Gang of four“ по дебито „Entertainment“ стана еден од водечките бендови во пост-панк движењето. Иако направија неколку паузи во музичкиот полет и ја менуваа оригиналната постава, Гил остана обединувачкиот мотор на „Gang оf four“ уште од деби синлот „Damaged Goods“ од 1978, па се до „Happy Now“, нивниот последен студиски албум од 2019 година.

Меѓувремено пост-панкерите внесуваа и денс-панк и фанк-рок елементи, издавајќи десеттина влијателни албуми. Многумина ги знаат „Gang of four“ и како еден од најгласните политички ангажирани состави во рокенрол светот.

На неколку пати, домашниот состав „Bernays Propaganda“ во своите објави пишуваа дека влечат влијанија токму од „Gang of four“.

Гил исто така беше и почитуван продуцент, не само за работата на „Gang of four“, туку и за бендови како „Red Hot Chili Peppers“, „The Stranglers“, „Killing Joke“, „Therapy?“, „The Jesus Lizard“, „The Futureheads“.