Во Музејот на современата уметност – Скопје утре во 19:30 часот ќе се одржи отворена дискусија на тема „Женски простори” како дел од перформативниот простор на вмрежување во рамките на програмата на изложбата „Родови перцепции“.
Во дискусијата ќе учествуваат претставнички на неколку организации кои континуирано работат на вклучувањето на жените во уметноста и културата. Така, работата на Место женск од Љубљана, Словенија ќе ја претстави Лана Здравковиќ, Јана Коцевска и Кристина Леловац ќе ги споделат искуствата на Тииит! Инк од Скопје, а Кумјана Новакова ќе говори за активностите во овој домен на МСУ – Скопје.
Место женск од Љубљана е една од најреномираните независни организации од просторот на бивша Југославија која веќе 25 години работи на полето на културата, уметноста, критичката теорија и феминизмот и се залага за еднаквост, разновидност и солидарност. Оваа годинаМесто женск ја доби престижната награда Принцеза Маргарет на Европската културна фондација.
Тииит.инк е најзначајната женска платформа во Скопје која работи на креирањето на услови за развој на женската интелектуална и креативна продукција и активното учествува во промоцијата и развојот на независната културна сцена.
„Женски простори” има за цел да ги идентификува новите иновативни формати за вклучување на жените во уметноста во различните контексти во регионот, преку вмрежување на актерки кои работат на искоренувањете на родовиот диспаритет во современата уметност.
„Женски простори” е дел од програмата на изложбата „Родови перцепции” која се реализира во соработка со Британскиот совет, а претставени се 39 дела од 25 светски реномирани авторки од Британија и Северна Македонија, како што се Трејси Емин, Сара Лукас, Лубаина Химид, Анета Светиева, Моника Мотеска. Посетителите на МСУ ќе можат да ја посетат изложбата сѐ до 12 август.