Во паркот Капиштец, во скопската општина Центар, во среда од 18 часот ќе се одржи детска ликовна работилница „Остави го таблетот, симни се пред зграда“.
Идејата на проектот е преку едукативни и уметнички работилници, низ игра, да се стимулираат најмладите жители на општина Центар на дружење со нивните врсници.
„Во текот на летните месеци ќе се организираат ликовни, театарски и музички работилници за деца, кои ќе ги водат искусни професионалци кои работат во овие области. Сите заедно ќе се потсетиме дека вклучувањето на децата во уметноста е клучно за нивната креативност и општиот развој, а влогот во здрави и креативни деца е наш влог во подобра и одржлива иднина. Колку повеќе децата игаат и се едуцираат надвор – толку подобро за сите“, стои во најавата за настанот, поддржан од општина Центар.
Од таму нагласуваат дека на децата им требаат многу можности за креативна игра и размислување, кои помагаат за здрав психофизички развој.
„Тоа нема да го најдат играјќи се на таблетот. Затоа оставете го и дојдете со нас да цртаме, боиме и да се забавуваме“, велат организаторите.