Конечна одлука по состанокот со Комисијата за заразни болести за начинот на наставата за претстојната учебна година се уште нема, а во меѓувреме продолжуваат консултациите на меѓуресорско ниво и на ниво на Владата, соопшти на денешната прес-конференција министерот за образование и наука Арбр Адеми.
На состанокот било дискутирано за начинот на организирање и реализирање на наставата во новата учебна година, а како што посочи Адеми уште еднаш се разгледани моделите подготвени за организирање на наставата.
„Вчера за ова прашање и за моделите дискутиравме и на седница на Владата и можам да кажам дека во последниот период во повеќе наврати на оваа тема дискутираме, се со цел да го најдеме најсоодветниот модел, земајќи ја предвид епидемиолошката состојба и на ниво на државата, и на ниво на општините“, рече Адеми.
МОН, како што посочи министерот, нуди три модели, односно, организирање на наставата со физичко присуство, далечинско учење со онлајн настава и комбиниран начин на организирање на наставата.
„Во МОН преовладува мислење дека треба да се организира настава со физичко присуство, но секогаш имајќи ја предвид епидемилошката состојба и условите во училиштата. Тоа значи дека секаде каде што ни дозволува епидемиолошката состојба да се организира настава со физичко присуство и секаде каде има услови да се организира наставата со физичко присуство, тогаш би требало да се организира наставата на таков начин“, рече Адеми.
Тој потенцираше дека ставот на министерството е јасен, односно, дека нема замена за наставата организирана со физичко присуство, но, додаде дека треба да се води сметка за здравјето на учениците и за епидемиолошката состојба.
Независно од тоа кој модел ќе се избере, додаде тој, одлуката може да трпи промени зависно од епидемиолошката состојба. Промени, рече, може да се случат и на еден ден пред почетокот на учебната година. Истовремено, дополни, за дел од промените ќе бидат потребни законски измени, за што ќе треба да профункционира Собранието.