Повеќе од 1,4 милиони луѓе во Македонија користат интернет или 68,1 процент од населението, а милион корисници се приклучени на социјалната мрежа Фејсбук, покажуваат последните податоци на специјализираниот статистички веб сајт „Internet world stats“.
Од земјите во регионот, повеќе од Македонците интернет користат Хрватите (75 проценти), Словенците (72,8 проценти) и Босанците со 68,7 проценти, а помалку Србија (66,2 проценти), Грција (63,2 проценти), Албанија (62,7 проценти), Црна Гора (61,4 проценти) и Бугарија (56,7 проценти).
Вкупно, во Европа интернет користат над 600 милиони луѓе, додека во светот има 3,345 милијарди интернет корисници или 46,1 процент од вкупната светска популација.