Во „Base42“ во Скопје викендов (29-30 ноември) се случува маратонот во стрипови, како дел од 14. регионална манифестација „24-часовно цртање на стрипови”, отворена за стрип автори од регионот.
Настанот е од 12 часот во сабота до 12 часот во недела.
„Ова е уникатен настан каде што автори, аматери и професионалци, имаат 24 часа да создадат целосен стрип со техника и должина по сопствен избор. Маратонoт паралелно се одржува во повеќе градови низ Хрватска, Словенија, Србија и Црна Гора, поврзувајќи ја регионалната стрип-сцена во едно големо креативно доживување“, соопштија од „Стрип трип фестивал“.
Освен во Скопје, учесниците цртаат во живо во определени пунктови и во Подгорица, Госпиќ, Херцег Нови, Сомбор, Љубљана, Осиек, Риека, Сплит, Загреб.
„Ќе има цртање, дружба, панична инспирација во ниедно време и многу смеење. Затоа, ако сте цртач, љубител на стрипови, или едноставно сакате да ги гледате другите како страдаат со рокови, ова е ваш настан“, пишаа претходно од „Стрип трип фестивал“.
Комплетираните струпови ќе бидат објавени на платформата на https://www.24satnocrtanjestripa.com
Инаку, на светско ниво иницијативата ја создаде реномираниот стрип теоретичар Скот Мек Клоуд, а во регионот авторот Дарко Мацан на Академијата во Загреб.
Оваа акција низ годините бргу се проширува, а една специфика е што оваа регионална иницијатива е сосема независна од светската акција, која се организира во октомври.
Бојан Шашевски
