Јапонската компанија Rakuten, која го поседува е-читачот Kobo и Play.com, ќе ја купи популарната апликација за комуникација преку интернет, Viber, за сума од 900 милиони долари. Од Rakuten велат дека го купуваат Viber за да станат „број 1 компанија за интернет услуги во светот“, пишува Wall Street Journal.
Viber, компанијa која е израелски стартап со седиште во Кипар, има 300 милиони корисници ширум светот, и иако продолжува да расте благодарение на бесплатните текстуални пораки и гласовни повици, сепак до сега немаше бизнис план со кој би ја наплатила оваа популарност.
Директорот на Rakuten, Хироши Микитани вели дека компанијата сама не би успеала да развие ваков сервис. Според него, Viber има „огромен потенцијал како гејминг платформа“ што го навестува планот дека апликацијата наскоро ќе претстави и игри. Со Viber, јапонската компанија ќе добие пристап до стотина милиони корисници кои ќе можат лесно да отворат шопинг профили на Rakuten.
Viber, покрај на мобилните телефони, е достапен и за Windows и Macintosh, што му дава предност пред другите конкурентни апликации за чет како WhatsApp.
Извор: It.com.mk