Канабисот ќе биде достапен за сериозно болните пациенти во Германија, со рецепт во аптеките и неговата употреба најверојатно ќе биде покриена со здравствено осигурување, соопшти министерот за здравство Херман Грохе. Законот се очекува да стапи на сила во 2017 година.
Олеснувањето во регулативите, има за цел да го намали страдањето на тешко болните пациенти кои претходно не можеа законски да го користат канабисот како лек. Предлог-законот се очекува да биде одобрен од владата деновиве, за потоа да се отвори дебата во германскиот Парламент.
„Нашата цел е тешко болните пациенти да се лекуваат на најдобриот можен начин“, изјави германскиот министер Грохе, кој додаде: „Ние сакаме трошоците за медицинскиот канабис да бидат покриени со здравственото осигурување, ако не може да им се помогне поинаку“. Исто така, министерот најави дека министерството ќе поддржи истражување за медицинските ефекти од канабисот.
Предлогот за воведување на канабисот во медицината доби критика од германската Асоцијација за коноп, лоби група која бара легализација на канабисот. Тие се спротивставуваат на предлогот, според кој, за пациенти кои користат канабис, задолжително треба да учествуваат во истражувањето, како услов за тие да добијат надомест. Ова според нив, е преседан, и е тешко да се прифати.