Данскиот актер Николај Костер-Валдау, популарниот Џејми Ланистер од телевизиската серија „Игра на Троновите“ (Game of Thrones), преку фотографии ги документира пределите на јужен Гренланд за сервисот на Гугл – „Google Street View“, со намера да го прикаже влијанието на климатските промени.
„Имаме одговорност да ја заштитиме оваа прекрасна планета на која живееме и почнувам од пред мојот куќен праг. Но, секаде и секој е засегнат од ефектите на загревањето на нашата планета. Ајде да застанеме заедно и да направиме нешто за тоа – заинтересирајте се за глобалните напори за справување со климатските промени и откријте начини на кои може да делувате“, напиша Костер-Валдау во блог пост за своето патешествие на Гренланд.
Костер-Валдау, кој е амбасадор на добра волја за Обединетите нации, е првата славна личност која фотографира за сервисот на Гугл, со препознатливата камера на грбот која прави фотографии од пределите наоколу, кои потоа секој корисник на сервисот може виртуелно да ги посети.
