Филмска вечер за промена на негативните наративи кон Ромите ќе се одржи утре (22 март) во Кино Култура во Скопје од 18 часот во организација на ХЕРА – Асоцијација за здравствена едукација и истражување.
Станува збор за романскиот филм „Тото и неговите сестри”, на режисерот Александар Нанау. Снимен во 2014 година, филмот досега е добитник на многу меѓународни награди меѓу кои и француска награда за култура во категорија студентско кино на Канскиот филмски фестивал.
Во 90-минутната филмска приказна, Тото и неговите сестри се оставени сами на себе, но можат да изберат да одат по патот на нивната мајка, вујковците и нивните пријатели кои препродаваат дрога или да ги прифатат предизвиците и преку одбегнување на пороците, чекор по чекор да излезат од кругот на сиромаштијата и да се упатат кон успехот.
По проекцијата ќе следува панел-дискусија со Силвана Наумова од ХОПС – Опции за здрав живот, Салија Беќир Халим од Иницијативата на жени од Шуто Оризари и Марија Папазова, професорка на Медицинскиот факултет во Скопје. Дискусијата ќе ја модерира Тефик Сали, доктор во Американскиот мировен корпус.
Влезот на настанот е бесплатен.