[Видео] Ентузијасти учествуваа во филмски предизвик и за 48 часа направија свои филмови

Под мотото „Не спиј – снимај“, во склоп на годинешниот фестивал „Ѕирни“ на кафе-киното „Котур“, се одржа новото издание на „Skopje Film Challenge“ (Скопски филмски предизвик). Се работи за 48-часовен филмски предизвик, каде ентузијасти имаат шанса да направат филм за еден викенд, и тоа под услов во краткиот филм да употребат три клучни зборови / поими.

Оваа година, тие зборови беа перница, мост и новинар.

Откако ги направија филмовите, делата беа проектирани и се натпреваруваа зa најдобар филм од предизвикот. Овогодишната жири комисија ја сочинуваа Горјан Атанасов – монтажер, Слаѓана Вујосевиќ – актерка и Игор Христов – режисер.

Во продолжение, ви ги презентираме годинешните филмови од „Skopje Film Challenge“, добитниците и учесниците, сите заедно:

„Несоница“ – прво место

„’Несоница’ е вознемирувачки портрет на младите во Скопје. Преку едноставни, но добро осмислени кадри, преку моќната тишина која буди внатрешен крик и силната симболика на губењето на еден едноставен предмет се раѓа метафората за колективното чувство на летаргија на една цела генерација. Ова е филм за тивката безнадежност на растењето во еден комплетно занемарен град… Пораката е јасна, нема сон во Скопје, само молк кај тие кои треба да се најгласни!“, посочуваат од „Skopje Film Challenge“.

Продукција: Мартина Гогова, Стефани Миленковска, Никола Станишлевиќ, Антингона Џорлева.

„Клошари“ – второ место

„Поради одличната режија и храбрата употреба на широкоаголни објективи и долги кадри со богат мизансцен, како и вешта употреба на визуелни ефекти и графички решенија низ целиот филм, втората награда ја доделуваме на краткиот игран филм ‘Клошари’“, нагласија од „Skopje Film Challenge“.

Режија Едис Усеин
Глумци: Борјан Поповски, Дамјан Шоќев, Андреј Самарџиев, Веран Павлов, Ана Ангелич, Надја Лукановска, Огнен Ромевски, Едис Усеин
Камера: Антонио Једиковски
Сценарио: Огнен Ромевски
Благодарение до: Мила Макаровска

„Fever Dream“ – трето место

„Трето место се доделува на филмот ‘Fever Dream’ заради успешната визуелна парарела помеѓу реалноста и сонот. Паралела која ве држи во една емоција на бладање до самиот крај“, рекоа од „Skopje Film Challenge“.

Напишано и режирано од: Ева Божиновска, Ведра Симонова, Теодор Дамјаноски
Принудени да глумат: Ева Божиновска и Теодор Дамјаноски
Снимено од: Ведра Симонова
Монтажа: Теодор Дамјаноски
Сториборд: Ева Божиновска
Помошна актерска екипа: Пријатели и случајни туристи
Музика: mobygratis

„Во чие име“ – специјално признание

„‘Во чие име’ е филм кој се издвојува со својот документарно игран пристап ,вклучувајќи ги итро зададените насоки (зборчиња) како прашања кои даваат реална критика кон глобалните проблеми“, соопштија од „Skopje Film Challenge“.

Тим Адисшакти: Наке Батев, Ивана Батев