Започна прскањето на улиците во Скопје со калциум магнезиум ацетат

Градот Скопје од синоќа започна со прскање на скопските улици со калциум магнезиум ацетат, како една од мерките за намалување на загадувањето на амбиентниот воздух.

Со ова средство во наредниот период ќе се прскаат булеварот „Свети Климент Охридски“ и улиците „Свети Кирил и Методиј“ и „Јордан Мијалков“ во централното градско подрачје, како и булеварот „Трета македонска бригада” (од крстосницата со улицата „Коста Новаковиќ” до раскрсницата со булеварот “Србија”) и булеварот „Србија” (од крстосницата со булеварот „12.Македонска бригада” до крстосницата со булеварите „Видое Смилевски Бато” и “Јане Сандански”) во Општина Аеродром. Согласно условите на терен, бројот на улици кои ќе се третираат со ова средство ќе се зголеми.

Од Град Скопје нагласуваат дека брзината на улиците, каде што ќе се испрска средството калциум магнезиум ацетат, ќе биде ограничена на 40 километри на  час, заради можна појава на лизгавост на коловозот. На улиците е веќе поставена и соодветна сообраќајна сигнализација, а изработен е и соодветен сообраќаен проект, соопштуваат властите.

Калциум магнезиум ацетат е средство кое се користи за контрола и намалување на ситната прашина (ПМ10 и ПМ2,5 честичките) и за стабилизација на патиштата. Од Град Скопје велат дека средството е еколошки производ, биоразградлив, не е штетен за растенијата (погоден е за апликација во близина на паркови и зелени површини), а најважно е што не е корозивен (нема да предизвика оштетување на возилата).

Производот е лесен за апликација и целосно е стабилен, што значи може да се чува за подолг период. При неговото аплицирање како резултат на неговиот состав може да се почувствува слаб мирис на оцет, кој исто така не е опасен по здравјето на луѓето.

Искуствата од европските градови каде што се користи ова средство  укажуваат дека со негово аплицирање потенцијалот за намалување на прашината е од 10 до 30 проценти.

За реализација на овој процес, ЈП „Комунална хигиена“ минатата година специјално адпатираше шест од новите возила, се вели во соопштението на Град Скопје