Комуналните служби на Општина Карпош вчера исчистија дива депонија во областа Горно Нерези, при што запленија поголемо количество на гуми.
Градоначалникот на Општина Карпош, Стефан Богоев, преку Твитер информираше дека гумите се подарени на ЗОО – Скопје каде ќе бидат адаптирани за реквизити или живеалишта на дел од животните.
Ми пристигнуваат повеќе прашања во врска со запленетите гуми кај дивата депонија во Горно Нерези – истите ги доделивме на ЗОО Скопје.
Тие ќе бидат адаптирани и прилагодени за реквизити/живеалишта за животни.
Гумите нема да загадуваат туку ќе бидат употребливи и корисни. ✔️— Стефан Богоев (@sbogoev) February 12, 2019
„Една од главните причини за аерозагадувањето е начинот на греење на домаќинствата, а анализите покажуваат дека голем број на домови се греат токму на отпадни гуми. Ваквиот начин на загревање е еден од главните загадувачи на воздухот, иако се идентификувани и други несоодветни отпадни суровини кои алтернативно се користат за затоплување во индивидуалното домување. Нашите инспектори се постојано на терен, во контрола и обид за спречување на употребата на ваквите штетни емитери на опасни честички во воздухот“, соопштија од Општината.
Комуналните служби на Општината денеска расчистуваа и дива депонија долж булеварот „8 – ми Септември“, во Тафталиџе 1, каде биле отстранети поголеми количества пластика, стакло и друг вид отпад.