Франција целосно ќе ги покрива трошоците за кондоми доколку се препишани од доктор, преку нова мерка која треба да го спречи ширењето на ХИВ и СИДА, соопшти министерката за здравство.
Мерката ќе почне да се применува од 10-ти декември, а средствата ќе бидат покриени од францускиот социјален систем.
„Знаеме дека секоја година имаме околу 6 илјади нови ХИВ-позитивни случаи, особено меѓу младите луѓе – 800 до 1.000 нови случаи има меѓу лицата под 25 години – кои најчесто користат кондоми при првото сексуално искуство но не и во следните“, изјавила министерката Агнеш Бузин за француското Интер радио, пренесува Еуроњуз.
Мерката, која доаѓа само неколку дена пред Светскиот ден за борба против СИДА на 1-ви декември, треба да ја „засили борбата против сексуално преносливите болести“, соопштуваат од француското министерство за здравство.
Покривањето на трошоците ќе биде само за еден бренд на кондоми, кој сè уште не е јавно објавен.