Градоначалникот на Општина Гостивар, Арбен Таравари, преку социјалните мрежи информираше дека директорите на општинските училишта во Гостивар повторно се променети од страна на Министерството за образование и наука.
„Метлата на Заев започна од Гостивар, денеска се поставени нови присилни директори по училиштата, по 6-ти пат се менуваат директорите во училиштата во нашата општина за 18 месеци“, напиша градоначалникот Таравари на својот фејсбук профил.
Од Министерството за образование и наука возвраќаат дека се работи за активирање на решенијата за враќање на директорите на работните позиции, од кои биле разрешени на незаконски начин. Од МОН додаваат и дека решенијата биле повлечени во април поради спроведување на фер и коректни претседателски избори.
„Одложувањето на примената, односно постапувањето по еден правен акт донесен согласно законите и во случајов, врз основа на одлука на Државната комисија за одлучување во управна постапка и постапка од работен однос и согласно извештаите од спроведените надзори на Државниот просветен инспекторат, не треба да значи негово забошотување и трајно непостапување по однос на истиот. Водејќи се по принципите на почитување на правото, правичноста и транспарентноста во работењето, Министерството за образование и наука има обврска и должност да постапи согласно своите ингеренции во секоја ситуација, вклучително и во конкретната во која беа констатирани низа прекршувања на законските прописи од страна на општина Гостивар во делот на разрешувањето на училишните директори од политички причини. А мешањето на политиката е недозволиво во областа на образованието, бидејќи најголемата штета која се прави, оди на сметка на учениците и нивниот воспитно образовен процес“, соопштија од МОН.
Министерството за образование и наука првично му ги одзеде ингеренциите на градоначалникот Таравари да отпушта и да именува директори на општинските основни и средни училишта во февруари минатата година, а ваква одлука повторно беше донесена и во февруари оваа година. Таравари тогаш ја обвини власта за тоталитарно однесување, а од Министерството велеа дека одлуката е донесена поради регистрирани незаконитости.