Унапредувањето на младинските политики во делот на образованието биле главен фокус на онлајн состанокот кој денеска го имаа Министерката за образование и наука Мила Царовска со работната група МЛАДИ-МОН, во која учествуваат претставници на младинските организации, Универзитетско студентско собрание и Сојузот на средношколци.
Главни теми на дискусијата биле потребата од измените во системот на стипендирање на студентите, нешто на што од Министерството за образование и наука (МОН) велат дека веќе се работи, како и за начините и можностите за ученичкото организирање, можноста за реализација на општо-корисна работа, како и за воспоставување на служби за бесплатна психолошка помош на високообразовните установи.
„Секогаш постои простор за подобрување и добра е идејата новите предлози кои ќе се изработат заедно со студентите, да влезат во новиот Закон за младински стандард. Како министерство за првпат овозможивме целосно електронско аплицирање за стипендии, а работиме и на навремено месечно исплаќање на стипендиите“, рече Царовска.
Министерката истакнала дека Министерството за образование и наука целосно ја поддржува идејата за ученичко организирање и истото веќе е уредено во Законот за основно образование.
Од МОН информираат дека Бирото за развој на образованието веќе извесно време работи на оваа тематика и во јануари 2020 изготвен е Водич за ученичко учество, ученичко организирање и заштита на детските права во основните училишта. Ваков документ треба да биде развиен и за средното образование со поддршка и консултација со средношколците, додаваат од МОН.