Како одговор на забраната на Трамп за влез на бегалци од шест муслимански држави, најголемиот синџир кафетерии во светот, Старбакс, најави дека ќе вработи 10 илјади бегалци и мигранти.
Хауард Шулц, извршен директор на компанијата, во писмо упатено до своите вработени во неделата напишал дека вработувањето ќе важи за сите продавници низ светот, а ќе започне во Соединетите Американски Држави. Таму, фокусот ќе биде ставен на вработување на имигранти „кои служеле со трупите на САД како преведувачи и поддршка“.
Шулц, поддржувач на Хилари Клинтон за време на претседатеските избори, осуди и други делови од агендата на Трамп фокусирани на имиграцијата, укинувањето на поранешното здравствено осигурување кое го воведе претходниот претседател Барак Обама и прекинот на трговијата со Мексико.
Во писмото пишува и дека Старбакс ќе им помага на одгледувачите на кафе во Мексико, ќе понуди здравствено образованието на вработените доколку биде укинета Обамакер, а ќе помага и на студенти и млади да добијат двегодишна дозвола за работа за да не бидат депортирани.
Спротивно од Шулц, извршните директори на Форд, Џенерал Моторс и Боинг се состанаа со Трамп, кој од нив побара да создаде нови работни места во САД, за сметка на фабриките кои постојат во Мексико.