Во студентскиот дом „Гоце Делчев“ денеска беше пуштено во употреба реновираното фудбалско игралиште во рамки на проектот „Студентски домови без корупција“, спроведен од Младински образовен форум (МОФ), и поддржан од Фондацијата Отворено општество.
Спортското игралиште беше обновено со помош на група млади ентузијасти, студенти и членови на МОФ, со поддршка на Државниот студентски дом „Скопје“ и Општина Карпош.
Пред
Потоа
„Државниот студентски дом „Скопје“, заедно со Младинскиот образовен форум спроведе низа акции во трите студентски дома „Стив Наумов“, „Кузман Јосифовски-Питу“ и „Гоце Делчев“ и останува отворен за соработки со други организации за заеднички активности за подобрување на животот на студентите“, изјави директорот на ДСД – Дарио Николовски.
„Речиси една година го работиме проектот заедно со ДСД кој вклучуваше две истражувачки анализи, обуки за станарите во домовите како и акции за разубавување и обновување на простори во домовите кои ќе бидат во функција на студентите“, дополни Мартина Илиевска од МОФ.
Игралиштето сега е обновено и целосно функционално, а со тоа станарите добиваат простор за спортски активности во текот на нивното домување во студентскиот дом „Гоце Делчев“.
Оваа акција е последна од низата студентски акции во државните студентските домови. Студентските акции од проектот се спроведуваа во државните студентски домови „Стив Наумов“ (реновирање на читалната и дворот на студентскиот дом), „Кузман Јосифовски-Питу“ (реновирање на диското и уредување на дворот) и „Гоце Делчев“ (обновување на спортското игралиште) во текот на месеците јуни и јули 2019 година.
Целта на овие акции е да поттикнат студентски активизам и самоорганизирање за адресирање на проблемите кои ги засегаат студентите-станари и волонтерски ангажман за нивно решавање.