Безбедносните информации и анализи моментално укажуват дека не постојат закани од нов мигрантски бран на т.н. „балканска рута“. Но, доколку мигрантската криза добие на интензитет, Македонија е подготвена во секој момент соодветно да реагира, изјави министерот за внатрешни работи Оливер Спасовски во Охрид каде учествува на Генералното собрание на шефовите на полициите од државите на ЈИЕ.
Одговарајќи на новинарско прашање за евентуално повторно активирање на мигрантската рута, имајќи ги предвид актуелните случувања на Блискиот Исток и односите меѓу ЕУ и Турција, Спасовски потсети дека македонската полиција јужната граница ја контролира засилена со полициски сили на повеќе држави од регионот и од ЕУ.
„Во завршна фаза сме со склучување договор со „Фронтекс“ што исто така ќе помогне во заштита на границата, така што Македонија е подготвена за каков било развој на настаните. Засега нема најави, информации кои би требало да загрижуваат“, рече тој.
Спасовски додаде дека Република Македонија, иако не е членка на ЕУ ги штити надворешните граници на Европа, а склучувањето договор со „Фронтекс“ ќе значи директна помош од Унијата во обезбедувањето на јужната граница од евентуален нов мигрантски бран.
Инаку, менаџерот во Транзитниот центар Табановце, Горан Стојановски, минатата недела рече дека кризата со бегалците и мигрантите е далеку од завршена. Според него, Центарот за справување со кризи предвидува зголемување на миграциските движења во наредните десет години. Како што се очекува зголемено миграциско движење кон Грција, рече тој, така се очекува и кон делот на територијата на Македонија.
Институциите очекуваат нов бран на мигранти, невладините велат дека балканската рута се избегнува