Ова лето организаторите на Егзит најавуваат врвни имиња од хип хоп сцената. Листата на потврдени изведувачи ја предводи британскиот крал на римите, раперот и активист Скепта (Skepta), единствениот ем-си кој успеал лондонскиот уличен звук да го популаризира во Америка, што го потврди и со планетарниот мегахит „Praise the Lord”, кој го сними со Ејсап Роки (A$AP Rocky).
Од британскиот остров доаѓа и Ај-Ем-Ди-Ди-Би (IAMDDB), која „Би-би-си“ ја смести на листата на изведувачи чиј звук ја одбележа минатата година, додека нејзините трап-џез бенгери „Shade“, „Drippy“ и „Kurr£ncy“, денес се неизоставни на најдобрите хип-хоп и аренби журки. За големото неделно финале на главната бина ќе се погрижи Дизајнер (Desiigner), творец на најзаразната хип-хоп песна деценијава, „Panda“, која стигна на врвот на американските топ листи и до денес изброја дури 1,3 милијарди прегледи на Јутјуб.
Своевидниот хип-хоп фестивал кој ќе трае од 4-7 јули, низ сите четири ноќи на Егзит ќе се прошири и на „Кокта Битс“ бината, нова задолжителна дестинација за сите рап фанови, која од оваа година ќе има само изведувачи од овој жанр.
Нејзе ќе ја предводат актуелни хип-хоп ѕвезди од регионот, вклучувајќи ги македонските Ајри Скреч и Шорти Пи (Irie Scratch & Shorty P), но и Војко В и Крешо Бенгалка, популарните регионални состави Aтлас Еротика, Бекфлеш, Бунтаи, Хејз, Хај5, И.Н.Д.И.Г.О, Кранкшвестер и 30Зона, но и новите таленти Клинац и Елон.
На тврдината ќе се соберат и најпопуларните диџејски колективи и мајстори зад микс пултот, Ватра, Кејк Бојс (Cake Boys), ФАМ, Бајко Феликс, Диџеј Лаки и Диџеј Рокам, Палас (Palace), Траплес (Traples), Лука Браси, ПЛИЗ (PLYZ),Њу Вејв (New Wave), Ин Да Клаб (In Da Klub), Трепај или крепај, Васке, Јунг Рош (Yung Rosh), Зимскии Лил Јунг (Lil Yung).