Преку здружена онлајн петиција, изминативе денови повеќе европски младински организации и политички групи побараа да се забрани неплатеното практиканство.
Тие ги повикуваат Европската комисија и земјите-членки да поднесат заедничка обврзувачка правна рамка за ефикасна и применлива забрана за неплатена практикантска работа, тренинг и стажирање и обезбедување минимален стандард на права во однос на работните услови.
Според иницијативата, неплатеното стажирање од страна на работодавците го прави преминот од образование на работа особено опасен за денешната младина.
„Неплатената практикантска работа е експлоататорска: Младите се експлоатираат работејќи бесплатно под изговор дека стекнуваат искуство. Искуството не ги плаќа сметките. Работата е работа и треба да се плати. Освен тоа, неплатените практиканти или другите практиканти кои се експлоатирани честопати не можат да побараат поддршка или совет од синдикат. Неплатената практикантска работа е неправедна: во одредени сектори на пазарот на трудот, позициите на почетно ниво се целосно заменети со неплатена практикантска работа. Не само што неплатената практикантска работа не ја нуди сигурноста и вредноста на вистинската, платена работа, тие исто така прават одредени сектори недостапни за луѓето кои не можат да си дозволат да работат бесплатно. На оние кои доаѓаат од богато семејство им се дава уште една предност во животот“, стои во повикот за потпишување на петицијата.
Во иницијативата досега се приклучија Федерацијата на младите зелени од Европа, Европска либерална младина, Младите демократи за Европа, Младите европски социјалисти, Младите европски федералисти и Европскиот младински форум.
„Глобалната пандемија ги стави нашите животи во мирување во последните две години. Додека нашите часови беа преместени на интернет, не само што ги пропуштивме клучните настани што требаше да ги обликуваат нашите животи, туку претрпевме и социјална и економска нестабилност. Повеќе не можевме да се потпреме на библиотеките за нашите книги и материјали. Моравме да купиме дополнителна технологија за да следиме онлајн часови. Бевме принудени да плаќаме такси за студентските домови во кои не престојувавме. Ни исчезнаа хонорарните работни места. Некои од нас мораа да се потпрат на помош во храна, а некои мораа да го напуштат образованието“, се вели во нивното заедничко соопштение.
Оттаму велат дека предизвиците што ги носи пандемијата се комбинираат со долгата постоечка борба за врзување крај со крај, наоѓање станови со прифатлива кирија, стекнување искуство и наоѓање значајна работа што ќе ги зајакнува вештините на младите, а истовремено ќе го олесни пристапот до пазарот на трудот.
Групата младински организации преку нивната реакција укажуваат дека младите луѓе кои немаат привилегија на финансиска сигурност, родителска поддршка или станови со евтина кирија, не можат да земат неплатена пракса, што го отежнува започнувањето на нивниот работен век и придобивките од социјалната мобилност.
„Практикантството е работа и работата мора да се плати. Неплатената практикантска работа е кршење на правото на фер наградување на младите. Покрај забраната за неплатена практикантска работа, потребни ни се правични плати за практикантите придружени со европски статус за практиканти и специјализанти, гарантирајќи минимален стандард на права во однос на работните услови. Обезбедувањето правични плати за практикантите ќе биде од корист за целото општество. Ќе бидеме праведно наградени за нашата напорна работа и ќе имаме поголема финансиска сигурност за да ја издржиме секоја идна криза“, се вели во здружената реакција.
Инаку, 2022 година е прогласена за Европска година на младите од Европската комисија.
Во 2018 година, пак, Европскиот парламент ги усвои реформите за практикантска работа, со кои се забранува неплатената практикантска работа, на иницијатива на Групата социјалисти и демократи. Па така, европратениците можат да понудат три вида стажирање во Брисел: стажирање за дипломирани студенти во период од шест месеци; да обезбеди место за обука во период од еден до пет месеци; и студиски посети во траење до шест недели. За првите две ќе се обезбеди фиксен надоместок, додека за третото не се предвидува надоместок.