Концерт на „Летечки пекинезери“ вечерва во Сули ан

Џез групата Летечки пекинезери вечерва ќе одржи концерт на Факултетот за ликовни уметности – Сули ан, како дел од фестивалот „Скопско лето“.

Групата ја сочинуваат Иво Солдатовиќ на кларинет, Петар Христов, тенор саксофон, Бојан Петков на гитара, Кирил Туфегчиевски – бас и Славчо Коцев на тапани.

„Летечки Пекинезери“ е состав кој постои веќе десет години на македонската џез сцена. Од првобитната формација има многу мали измени, но филозофијата на овој бенд сепак останува иста во текот на годините. Главната цел на овој состав е да се придобие секој слушател без разлика дали се работи за претерано музички едуцирана личност или пак лаик во таа област.

Нивниот звук најмногу гравитира кон свинг звуците од 30-те и 40-те години на 20 век, но ако внимателно слушате или ако сте познавач на свинг музиката ќе наидете на многу моменти кои и не се толку својствени за составите од тоа време.

Досега групата има издадено два албума: „Летечки Пекинезери” (2011) и „Dog Show/Изложба на кучиња“ (2014) и двата се издадени за SJF Records (Skopje Jazz Festival Records).