Истражувачкото друштво на студенти биолози, во соработка со Институтот за комуникациски студии организира изложба на био фотографии на тема „Урбани безрбетници“, која ќе се одржи во среда (19 јуни) од 19 до 21 часот во мултимедијалниот клуб „Кафе и филм Котур“.
На настанот ќе бидат изложени 130 фотографии кои беа поднесени на биофото конкурсот и кои ја прикажуваат биолошката разновидност во урбаните средини. На изложбата ќе бидат прогласни и најдобрите три фотографии кои беа избрани од комисијата составена од професори по биологија и фотографи, како и преку гласање на Фејсбук.
„Повелете преку фотографиите одблиску да ги запознаете најистрајните животински видови во градската урбанизација“, повикуваат од Друштвото на студенти биолози.
Изложбата се организира како дел од кампањата за подобра животна средина „Не игнорирај! Реагирај!“, која ја реализира Институтот за комуникациски студии, а е финансирана од Британската амбасада во Скопје.