Граѓански собир по повод 25 април, Светскиот ден за борба против родителско отуѓување ќе се одржи денес пред Собранието на Република Македонија. Настанот чиј почеток е најавен за 17.30 часот е организиран од страна на Граѓанската иницијатива за заедничко и одговорно родителство по развод, со поддршка од Првата детска амбасада во светот Меѓаши.
„Целта на овој собир е да се укаже на фактот дека се повеќе деца се предмет на родителско отуѓување, односно влијание на едниот родител за децата да го отфрлат другиот родител. Ваквата тешка злоупотреба на децата е директна последица од начинот на постапување на државата со децата од разведени бракови и нивното доделување на чување и воспитување на само еден родител“, посочуваат организаторите на собирот.
На собирот ќе се обратат претставници на организаторите како и родители, кои на своја кожа го осетиле родителското отуѓување. Својата болна приказна ќе ја сподели родител, чие дете веќе подолго време е надвор од Република Македонија и со него нема контакт. Исто така, се очекува преку видео порака поддршка да дадат и граѓански здруженија од соседните држави.
Граѓанската иницијатива за заедничко и одговорно родителство по развод своите барања за измена на посточеките закони и пракса, ќе ги достави до Собранието и до Владата на Република Македонија.