Локалниот огранок на „Fridays For Future“ во Скопје, движењето инспирирано од младата климатска активистка од Шведска, Грета Тунберг, денеска направија уште една герила-акција на скопските раскрсници.
Групата опремена со транспаренти на кои пишуваше „Системски промени, не климатски промени“, го привлекоа вниманието на возачите и минувачите на булеварот „Партизански одреди“. На секое црвено светло за возачите – истапуваа на пешачкиот за да ги покажат своите пораки.
Од иницијативата информираат дека ваквата герила-акција продолжува во попладневните часови, на различни улици и раскрсници.
Претходно, огранокот, на 6 септември направија герила акција во близина на просториите Град Скопје, каде со „die-in“ форма на протест, во која учесниците глумеа дека се мртви, протестираа поради игнорирањето на повиците за мерки против климатските промени.
Инаку, од иницијативата од 20 септември планираат низа активности – учество во велосипедско возење, ослободување на заробени дрвја, панел дискусија и протестот на 20 септември. Активностите во рамки на глобалниот протест „Недела за иднината“.
