Денеска во просториите на Државната изборна комисија (ДИК), за предвремените парламентарни избори закажани за недела, 11 декември, ќе гласаат членовите на избирачките одбори кои ќе го спроведуваат гласањето во дипломатско-конзуларните претставништва и во конзуларните канцеларии на Република Македонија.
Гласањето е отворено во 7 часот и ќе трае до 19 часот, а својот глас треба да го дадат 325 членови на избирачките одбори во дипломатско-конзуларните претставништва и во конзуларните канцеларии.
Гласачите во дијаспората ќе гласаат во 46 дипломатско-конзуларни претставништва и во конзуларни канцеларии еден пред изборите, односно во сабота на 10 декември од 7 до 19 часот по локално време.
Најмногу пријавени за гласање има во Берн – 4.256, во Венеција – 2.724, во Детроит – 1.170, Њујорк – 1.168, Мелбурн – 1.112.
В сабота, исто така, треба да гласаат и 13 внатрешно раселени лица, 2.015 лица кои се во притвор или во затвор и болни и немоќни лица што се пријавени за гласање.