Владата на австралиската држава Викторија ќе се извини за законите од минатото кои ја криминализирале хомосексуалноста.
Премиерот на Викторија, Daniel Andrews, во неделата најави дека ќе упати официјално извинување на 24. мај за поранешните закони во земјата според кои хомосексуалните мажи можеле да бидат затворени и до 15 години за консензуален секс со друг маж. Ќе се одбележат и повеќе од 35 години откако хомосексуалноста била декриминализирана, во март 1981.
„Овие закони претставуваат темна сенка на предрасудите кои постојат и денес, а нашето извинување е мал, но значаен начин да се поправи таа историска грешка“, изјавил Andrews.
Во септември ќе бидат исчистени и досиејата на мажите обвинети за хомосексуалност во периодот додека законот сѐ уште не бил поништен.
„Оваа можност важи за сите „сексуални и морални прекршоци“, кои некогаш ја криминализирале консензуалната хомосексуалност“, објавила владата.
„Овие прекршоци никогаш не требало да се сметаат за криминални дела. Можноста за чистење на досиејата ќе ги поправи грешките направени во минатото и ќе ги ослободи индивидуите од неправедно отвореното криминално досие“, изјавил во септември главниот правобранител Martin Pakula.
Дека ќе ги поништи законите и ќе ги исчисти досиејата на осудените хомосексуалци објави и австралиската држава Квинсленд.
Извор: Mashable