Иницијативата „Во одбрана на Дебар маало“ повика на мирен протест за утре (21 август) поради сообраќајниот и градежен хаос во некогаш една од најубавите населби во Скопје.
„Окупираните тротоари, неконтролираното градење, нерешениот паркинг простор и лошиот режим за дотур на роба, го направија маалото небезбедно за живеење. Дојди на мирен протест, за безбедни улици и тротоари за пешаци, во Дебар Маало, за твоето маало, за целиот град!“, стои во најавата за протестот.
Зборно место е зградата на Министерство за култура, во 18 часот.
Протестот доаѓа по јавните барања на иницијативата за решавање на прблемите на жителите од овој дел на градот, пред се бучавата од локалните кафулиња, заробените тротоари од угостителските објекти, но и сообраќајниот хаос. Капак на се беше прегазувањето на жена минатата недела, од комбе кое вршело дотур на роба, пред основно училиште.