На главната бина на Д Фестивал ќе настапи легендарниот британски панк бенд The Toy Dolls (Тој Долс). Групата годинава ја одбележува 36-годишнината од своето постоење со настапи на музичките фестивали ширум Европа, меѓу кои се и единствениот тридневен фестивал на отворено во земјава.
По повеќе од три децении активно постоење на музичката сцена, 12 студиски албуми и огромен број на басисти и тапанари кои протатнија низ бендот, со Toy Dolls од Д Фестивал најавуваат уникатен сценски настап спакуван со синхронизирани скокови и кореографија, вртоглави гитари, заводливи мелодии и бројни хитови како „Dig That Groove Baby“, „Cloughy Is A Bootboy“, „My Girlfriends Dad’s A Vicar“…
Во 2012 година Toy Dolls се вратија на музичката сцена со албумот „The Album After the Last One“, чиј наслов е пародија на нивниот претпоследен албум од 2004 година насловен „Our Last Album“. Бендот веќе го најави својот 13-ти студиски албум . Низ изминатите 36 години The Toy Dolls зад себе изградија една од најсилните и најлојалните фан бази кои постојат за панк бендовите од нивниот калибар. Првиот албум на групата „DIG THAT GROOVE BABY“ (снимен во 1983) важи за еден од најдобрите панк албуми на сите времиња, покрај нивниот седми албум од 1993 година, „ABSURD DITTIES“. Со обработката на детската песна „Nellie the Elephant“ во 1984 година се искачија на 4 место на британската топ-листа, но и светските топ-листи, а таму се задржаа дури 12 недели.
Вклучувајќи ги „live“ албумите и компилациите, TOY DOLLS имаат објавено повеќе од 50 изданија.
Групата е формирана во октомври 1979 година, во Сандерленд, Велика Британија. The Toy Dolls се: Olga (вокал/гитара), Tommy Goober (бас) и The Amazing Mr. Duncan (тапани).
Д Фестивал ќе се одржува од 15 до 17 јули во Дојран! Покрај Tоѕ Dolls, својот настап веќе го потврдија Dub Pistols и Чиста Околина на главната бина, The Project Orpheus, Millko, Самостални Референти, Палиндром, Këpurdhat, Anna O, Metanoia и PaprikaPaprika на „Москито Стејџ“.