„Освен што нема идеи, Владата на Никола Грувески повеќе нема ниту пари за нови вработувања во високото образование“, изјави денеска Петар Атанасов, претседател на Комисијата за образование на СДСМ, а пренесе А1ОН.
Со допис од Министерството за финансии преку Министерството за образование, Универзитетот Свети Кирил и Методиј, на 2 ноември е известен дека средствата за исплата на платите на вработените за месеците октомври и ноември ќе биде помал за 10 милиони денари. Односно, за платите на нововработените од првата група согласно Законот за трансформација на работниот однос“, вели Атанасов.
„Намалувањето се однесува на сите државни универзитети, иако за вработувањата Министерството за финансии веќе дало согласност. Само на УКИМ согласно овој закон треба да се трансформираат во редовен работен однос 317 лица.
Значи, Владата предизборно сака да вработува, ама за тоа пари во буџетот нема. Што ќе се случи кога и втората група ќе го трансформира својот работен однос во декември, а јануарската плата нема да ја добие?
Само пред неколку месеци Груевски изјавуваше дека платите од октомври годинава ќе ги зголеми за 4%. Ама пари нема! Парите Никола Груевски одамна ги потроши! Тоа е виртуелниот свет на Никола Груевски кој предзиборно ветува се и сешто. Ветува, ама ветувањата му се неостварливи. Никола Груевски десет години го уништува високото образование, ја урниса автономијата на универзитетот, трошеше милиони евра на се и сешто, а сега сака народот да му ги плаќа сметките“, изјави Петар Атанасов.