Во услови кога сите магистрални и регионални патишта кон Охрид останаа непроодни и неисчистени од снегот, а власта секоја година, на три фирми им дава 1,5 милион евра народни пари, пратениците од ВМРО-ДПМНЕ од Охрид, без никаков срам, уште еднаш, лажејќи ги охриѓани, ги повторуваат ветувањата од 2013 и 2014 за нови проекти, реагираат од СДСМ, а по повод вчерашната прес-конференција на ВМРО-ДПМНЕ во која партијата вети ново пристаниште (марина) и експресен пат Охрид-Пештани.
Од СДСМ велат дека власта во заминување ветуваат изградба на пристаниште по четврти пат. Сметаат дека ветувањето е исто, само локацијата се менува.
„И експресниот пат Охрид – Пештани се ветува три години, но неговата изградба никако не почнува. Никогаш нема да бидат реализирани затоа што имаат негативно влијание врз животната средина. Со таквите проекти сериозно се загрозува нашето природно наследство, Студенчишкото Блато и Галичица. Затоа меѓународните финансиски институции одбиваат да ги финансираат ваквите штетни проекти на корумпираната власт, а Охрид годинава ќе се најде на листата на загрозени подрачја што се под заштита на УНЕСКО“, се вели во сопштението од општинската организација на СДСМ од Охрид.
Од таму побараа пратениците од ВМРО-ДПМНЕ од Охрид да и’ објаснат на јавноста зошто цели четири години не е реализирана ниту една од ветените инвестиции и зошто Општата болница во Охрид е со блокирана сметка и во финансиска дупка која надминува 2,5 милиони евра.