Музејот ќе биде дом на неговата уметничка колекција вредна 1,25 милијарди долари. Пино, чија компанија за трговија со висока мода е сопственик на куќите како Ив Сен Лорен и Гучи, ќе ја реставрира зградата која му припаѓа на градот со свои пари, а за возврат ќе добие сопствеништво над неа во наредните 50 години.
Проектот, во кој јапонскиот архитект Тадао Андо ќе инсталира огромен бетонски цилиндар во средината на уникатната кружна зграда, е толку амбициозен, што Андо ветил дека ќе ја „одвее лошата политичка состојба во моментов, и ќе ги зацели раните на Брегзит“.
„Времињата во Европа се турбулентни – честите терористички напади и повлекувањето на Обединетото Кралство од ЕУ го зголемија стравот за тоа што носи иднината, а земјите и луѓето се чинат несигурни за своите идентитети“, вели Андо. Тој ветува дека „уметноста ќе донесе зацелување, а зградата ќе ја обнови надежта во иднината“.
Инаку, ова е една од најголемите трансформации на париска зграда. Берзата е уникатна кружна структура која се наоѓа во историски кварт, а некогаш служела како пазар за житарици. Се смета за една од најзначајните структури во градот, заедно со Нотр Дам поради уникатната архитектура.