Со рута од Музеј на Град Скопје, улица „Македонија“, па до Универзитетот на ЈИЕ (Стоковна куќа „Мост“), денеска се одржа осмиот Марш на толеранцијата, со кој беше промовирана и кампањата „Омразата е слабост“.
Маршот беше организиран од Хелсиншкиот комитет за човекови права, а беше посветен на борбата против говорот на омраза. Традиционално се одржува за одбележување на Меѓународниот ден на толеранцијата, но овој пат беше споен и со 13 ноември – Денот на ослободувањето на Скопје.
Иницијаторите на Маршот веќе потенцираа дека политичката состојба во која се наоѓа македонското општество, особено последната деценија, предизвика многу негативни и насилни трендови кои се во спротивен правец на заштитата, гаранцијата и остварувањето на човековите права и слободи.
Меѓу другото, како што рекоа од Хелсиншки, овие негативни трендови и говорот на омраза се шири и особено ги погодува ранливите групи, Ромите, ЛГБТ заедницата, луѓето со попреченост, бегалците, слободомислечките граѓани и сите оние кои ја критикуваат власта.
„Припадниците на ранливите и маргинализирани групи, постојано се изложени на насилство, кон нив е користен говор на омраза и тие се цел на дела од омраза. Оттука, со тоа што нивните фундаментални карактеристики се нападнати токму преку овие негативни трендови – на говор на омраза и дела од омраза – од овие групи и поединци се прават места на повреда, и некои идентитети се вреднуваат повеќе од некои други идентитети“, соопштија од Хелсиншкиот комитет.
Маршот беше поддржан и од Платформата против говор на омраза, од каде се спротивставуваат на културата на неказнивост и ги повикуваат надлежните државни институции: Министерството за внатрешни работи, јавните обвинителства и судовите да преземат итни и неодложни мерки за гонење и санкција на говорот на омраза.
Фото: Хелсиншки комитет за човекови права